MANILA, Philippines - Nabaril at napatay ng mga tauhan ng Manila Police District- Station 9 ang tinaguriang drug lord na ‘chop-chop king’ matapos ang engkuwentro sa naganap na buy-bust operation, kahapon ng umaga sa Isla Puting Bato, Tondo, Maynila.
Apat na tama ng bala ng baril sa katawan ang tumapos sa buhay ni Abdhul “Basit” Macalaw, 43 , matapos na makipagpalitan ng putok kina P/Supt.Ernesto Tendero, hepe ng MPD-PS 9 at mga tauhan nito.
Naganap ang engkuwentro dakong alas-6:30 ng umaga, matapos na magpositibo na nasa bahay ang suspect na target ng operasyon ng pulisya. Matagal na umanong under surveillance ang suspect dahil sa illegal nitong aktibidad sa Maynila.
Nalaman na kay Macalaw ibinebenta ang mga tsina-chop- chop na piyesa ng motorsiklo sa Maynila.
Bukod dito, sa kanya rin umano nanggagaling ang mga ibinebentang droga sa Maynila at nasa talaan din ito ng most wanted sa lungsod. Sa halip na sumuko sa mga awtoridad, nanlaban ang suspect dahilan ng kanyang kamatayan.