Tenants ng Ayala Alabang hihigpitan

MANILA, Philippines - Ibayong paghihigpit pa ang ipatutupad ngayon sa mga tenants sa ekslusibong subdibisyon na Ayala-Alabang Village makaraan ang pagkakatuklas sa tatlong shabu laboratory sa loob nito.

Ito’y makaraan ang pagpupulong sa pagitan ng mga opisyales ng pamahalaang lungsod ng Muntinlupa, Phi­lippine Drug Enforcement Agency (PDEA), Brgy. Aya­la-Alabang Chairman Alfred Xerex Burgos at Ayala Alabang Village Association president Dr. Leandro de Leon.

Dito napagkasunduan ang mahigpit na “profiling” o pagtukoy sa pagkakakilanlan sa mga tenants,  pagsa­sagawa ng “background check” sa mga personalidad na nais umupa sa mga bahay sa subdibisyon, pagbi­bigay ng “visiting rights” sa may-ari upang mainspeks­yon ng regular ang mga pi­­nauupahan, at pagsasagawa ng “information at edu­cational campaign” sa mga residente.

Sinabi ni Omar Acosta, tagapagsalita ni Mayor Al­drin San Pedro, na importante na makilala muna ang background ng mga nais umupa sa mga real property hindi lang sa loob ng Ayala Alabang Village ngunit ma­ging sa ibang lugar upang matiyak na hindi gagamitin ang ari-arian sa iligal na gawain.

Matatandaan na unang sinalakay ng mga tauhan ng PDEA ang isang shabu lab sa loob ng Ayala Alabang Village nitong nakaraang Enero 7 kung saan limang Chinese national ang nadakip at sinundan pa ng pagkakadiskubre sa da­lawa pang shabu lab nitong Enero­ 14 sa naturang subdibisyon.