Driver inararo ng truck patay

MANILA, Philippines - Halos mapugot ang ulo ng isang 32-anyos na driver ma­karaang humampas ang katawan sa nawasak na windshield ng sinasakyang delivery van matapos na salpukin buhat sa likuran ng isang trailer truck, kahapon ng madaling-araw sa Taguig City.

 Nakilala ang nasawi na si Rolly Cerenio, may-asawa, at dating naninirahan sa C. Raymundo Avenue, Brgy. Maybunga, Pasig City. Hawak naman ngayon ng pulisya ang nakabanggang truck driver na si Alexander Santos, 49, binata, at naninirahan sa B. Mayor, Bustos, Bulacan.

 Sa ulat ng Traffic Section ng Taguig City Police, naganap ang insidente dakong alas-4:20 ng madaling-araw sa southbound lane ng C-5 Road, Brgy. Western Bicutan, Taguig.

 Nabatid na huminto sa fast lane ng C-5 Road ang delivery van (RJN-631) na mina­maneho ni Cerenio nang biglang magkaaberya umano sa compressor ng air brake nito.  Rumaragasa naman buhat sa likuran nang bumangga ang dambuhalang trailer truck (ZCT-668) na minamaneho naman ni Santos.

 Sa lakas ng pagkaka­bangga, humampas ang ulo at katawan ng biktima sa windshield ng kanyang van na na­wasak.