MANILA, Philippines - Patay ang isang 21-anyos na binata matapos na pagtripan ng siga at barkada kahapon ng umaga sa Sampaloc, Maynila.
Idineklarang dead-on-arrival sa Ospital-ng Sampaloc ang biktimang si John Andres Cuevas, ng Mabini St., Sampaloc, sanhi ng mga saksak sa iba’t ibang bahagi ng katawan.
Naaresto naman nina Kagawad Maria Paz at Rey Puato ng Brgy. 413 Zone 14 Dist. 4 Sampaloc, Maynila ang mga suspect na sina Rofus Shalonggo, 22, alyas Chekwa at si Anthony Santos, 32, alyas Demet, habang nakatakas naman ang dalawa pa nilang kasamahan na sina Jason Baroga at Jon-Jon Nano.
Dakong alas-6:20 ng umaga nang mangyari ang insidente sa Jocson St. malapit sa kanto ng Cayco St., ng nasabing lugar.
Ayon sa testigong si Alvin Carbinilla, 16, nag-iinuman umano sina Shalonggo at Santos nang mapadaan ang biktima at niyaya itong tumagay.
Subalit makalipas ang ilang sandali ay umalis ang dalawa at iniwang mag-isa ang biktima sa inuman at nang bumalik ay kasama na ng dalawa sina Baroga at Nano na pawang may mga dalang patalim na isinaksak sa biktima.
Nabatid na kilalang nangungursunada ang mga suspect sa lugar kung saan may patung-patong na mga kaso. Patuloy naman ang isinasagawang imbestigasyon ng pulisya sa kaso para sa ikadarakip pa ng dalawang nakatakas na suspect.