Lider ng carjacking group balik-selda

MANILA, Philippines - Balik selda na naman ang tinaguriang lider ng kilabot na ‘Marteja/Briones carjacking group’ matapos na muling arestuhin ng tropa ng Quezon City Police District sa lungsod Quezon kahapon.

Ayon kay Chief Supt. George T. Regis, si Edelberto Marteja, 22, ay naaresto sa kanyang tahanan sa Lorraine corner Cathe­rine St., Brgy. Apolonio Samson ganap na alas- 2 ng hapon sa bisa ng warrant of arrest laban dito.

Nauna nang nadakip si Edelberto kasama ang apat pang tauhan nito ng mga operatiba ng District Anti-Carnapping Unit noong Agosto 15, matapos na matiyempuhan sa may Roosevelt Quezon Avenue, bunga ng warrant of arrest na ipinalabas ng Malolos Regional Trial Court sa kaso ng carnapping.

Matapos nito ay agad na nakapag-piyansa si Marteja dahilan para siya muling makalaya. Ayon naman kay Chief Inspector Rodelio Marcelo ng Criminal Investigation and Detection Unit, muling dinakip si Marteja dahil sa walong nakabinbing kasong kriminal na inihain ng DACU laban sa kanya sa prosecutor’s office.