Retirement benefit ng MMDA ilalabas na

MANILA, Philippines - Matapos ang apat na taong pagkabinbin, ilalabas na rin ng Department of Budget and Management (DBM) ang retirement benefits ng nasa 3,000 retiradong kawani ng Metro­politan Manila­ Development Authority (MMDA).

Inihayag ni MMDA Chairman Francis Tolentino na ina­pru­bahan na ng DBM ang paglalabas ng pondo para sa benepisyo ng mga retiradong empleyado ng ahensya na naka­binbin pa buhat noong taong 2007 sa panahon ni dating­ Pangulong Gloria­ Macapagal-Arroyo.

Nabatid na naglabas na ng direktiba si Pangulong Be­nigno­ Aquino III sa DBM na laanan na ng pondo ang MMDA sa mga benepisyong utang nito sa mga dating tauhan matapos na maisaayos na nila ang lahat ng doku­mento na iniwan ng dating administrasyon.

Ipinaliwanag ni Tolentino na inabutan na niya ang problema sa nabimbing pamamahagi ng retirement benefits ng naturang mga kawani kaya’t isa ito sa kanyang mga inu­nang asikasuhin matapos malaman niya na ang iba sa mga nag­hahabol ng benepisyo ay nakamatayan na ang ina­asam na biyaya.

Ngayong umaga ay nakatakdang magpamahagi ng coupon ang MMDA sa lahat ng mga nagretirong kawani na nag­hahabol ng kanilang retirement benefits na magi­ging batayan nila kung kailan at saan nila kukuhanin ang kanilang benepisyo.

Ibabatay naman ng ahensiya sa tinatanggap na salary­ grade ang pamamahagi ng retirement benefits ng mga retira­dong­ kawani habang sa asawa o anak naman ibibigay ang benepisyo ng mga namayapa na.

Sinabi ni Tolentino na ang pamamahagi ng coupon ay isang paraan upang hind maging magulo ang isasagawang pamamahagi dahil dito ilalagay ang schedule ng kanilang pag­kuha ng tatanggaping benepisyo.