MANILA, Philippines - Isang babaeng dental assistant ang nasawi makaraang barilin sa ulo ng isang lalaking nagpanggap na kostumer sa loob ng isang dental clinic sa lungsod Quezon kamakalawa.
Kinilala ang biktima na si Kristy Gene Topinio, 21, ng Roosevelt Avenue sa lungsod.
Inilarawan naman ng pulisya ang suspect na nasa pagitan ng edad 38-40, may taas na 5’6’’ at katamtaman ang pangangatawan.
Ayon sa ulat, nangyari ang insidente sa loob mismo ng dental clinic ng isang Dr. Felisa Chua sa No. 116 Roosevelt Avenue sa lungsod.
Sa naturang clinic umano nagta-trabaho ang biktima kung saan ang amo nito ay si Dra. Joy Castillo.
Sinabi ni Dra. Castillo, bago ang insidente, isang lalaki ang nagpunta sa kanyang klinika at napanggap na magpapalinis ng ngipin ganap na alas-5 ng hapon.
Matapos umano niya itong linisan ng ngipin ay nagpunta siya sa banyo, kung saan mula dito ay bigla na lang siya nakarinig ng putok ng baril.
Sa takot ay nagpasya si doktora na tumakbo palabas at magtungo sa katabing bahay ng dental clinic na pagmamay-ari rin ng pamilya Chua at humingi ng tulong sa barangay.
Pagdating ng mga opisyales ng barangay ay nakita na lamang nilang nakahandusay ang duguang bangkay ng biktima malapit sa pintuan ng dental clinic.
Sinabi ni Superintendent Audie Madrideo, hepe ng PS2, hindi umano nila isinasantabi ang motibo ng pagnanakaw kahit na wala naman umanong nagalaw sa gamit ng biktima at ng kasama nitong dentista.
Patuloy pa rin ang imbestigasyon ng awtoridad kaugnay sa nasabing insidente.