MANILA, Philippines - Isang tanker truck na naglalaman ng halos P1 milyon langis ang narekober sa Pampanga matapos na haydyakin sa lungsod Quezon kamakalawa ng gabi.
Ayon kay SPO4 Alan dela Cruz, hepe ng theft and robbery section ng Quezon City Police District (QCPD), mismong ang Mexico Municipal Police Station sa Pampanga ang nakarekober sa Prometheum Trucking Service’s tanker truck (UUC-592).
Sinabi ni Dela Cruz, nakatanggap sila ng tawag mula sa municipal police station kaugnay sa pagkakatagpo nila sa truck ganap na alas-9, Linggo ng umaga sa may north-bound lane ng Provincial Road sa Sta. Maria, Mexico, Pampanga.
Dito anya ay naiwan pa ang may 20,000 litro ng bunker fuel nito.
Bagama’t ang langis na laman nito ay umaabot sa halagang P800,000, naniniwala ang opisyal na agad na inabandona ito ng mga hijackers matapos malaman na naglalaman ito ng bunker fuel sa halip na petroleum o diesel fuel.
Nilinaw ni Dela Cruz na ang bunker fuel ay karaniwang ginagamit sa mga factory, mga planta at mga barko na mahirap na ibenta kaysa sa gasolina o diesel.
Ayon sa ulat, ang tanker truck ay hinaydyak ng walong armadong kalalakihang nagpakilalang mga pulis sa may panulukan ng D. Tuazon at Roxas Sts. sa Laloma, Quezon City ganap na alas-10:30 Sabado ng gabi. Ricky T. Tulipat)