MANILA, Philippines - Labing-dalawa katao ang nasugatan sa salpukan ng dalawang pampasaherong bus sa may kahabaan ng EDSA sa lungsod Quezon kahapon ng madaling-araw.
Sa ulat ng Traffic Sector 1 ng Quezon City Police District, ang mga nasabing biktima ay pawang mga pasahero ng Roval Transport bus na agad na itinakbo sa East Avenue Medical Center matapos na magtamo ng mga sugat sa kanilang mga ulo, mukha at katawan.
Nangyari ang insidente sa may south-bound lane ng EDSA ganap na alas-3:45 ng madaling-araw.
Diumano, tinatahak ng Roval Transport bus na minamaneho ni Mario Denovo ang nasabing kalsada nang biglang salpukin nito ang huling bahagi ng Starbus na minamaneho naman ng isang Rolando Rivera.
Sa lakas ng pagkakasalpok ng Roval bus sa Starbus nasugatan ang 12 sakay na pasahero ng huli matapos na tumilapon at tamaan ng mga bubog na galing sa mga nabasag na salamin at mabangga ang kanilang katawan sa upuan.
Agad namang isinugod sa East Avenue Medical Center ang mga sugatan para malapatan ng lunas.