Inuman niratrat: 4 utas

MANILA, Philippines - Apat katao ang nasawi habang dalawa pa ang malubhang na­sugatan matapos pagbabarilin ng anim na armado­ng kalalakihan sa lungsod Quezon, ayon sa pulisya kahapon.

Kinilala ang mga nasawi na sina Liberato Paez, 50; Rogelio De Ocampo, 36; Rogelio Agustin, 49; at Germinio Manansala, 44.

Sugatan naman sina Zaldy Ballesteros, 43; at Armando Garcia, 47.

Agad namang nag­lahong parang bula sa lugar ang mga suspect matapos ang krimen na naglakad lamang patungo sa Freedom Park.

Ayon sa ulat ni SPO1 Pascual Fareag, naganap ang insidente habang nag-iinuman ang anim na biktima sa labas ng isang tahanan sa Kaibigan St., Kalayaan B, Brgy. Batasan Hills ganap na alas- 9:25 ng gabi.

Nasa kasarapan ng inuman ang mga biktima nang biglang dumating ang mga suspect na pawang mga armado ng baril at pinagbabaril ang mga una.

Matapos ang pa­mamaril ay nagsipagtakbo papalayo ang mga suspect. Hindi pa mabatid kung ano ang posibleng motibo sa pamamaril.

Patuloy ang imbestigasyon ng awtoridad sa naturang insidente. (with trainee Mary Jaramie Caluma)