MANILA, Philippines - Nalimas ng apat na miyembro ng Estribo gang sa 20 pasahero ng bus ang P500,000 halaga ng alahas at salapi sa Quezon City kahapon ng umaga.
Base sa report, dakong alas-7:15 ng umaga nang holdapin ng apat na miyembro ng ‘estribo gang’ ang may 20 pasahero ng Malanday Metro Link Bus (TYH- 641) sa EDSA, Quezon City.
Sa imbestigasyon, patungo sa direksiyon ng Cubao galing sa Malanday, Valenzuela ang nasabing pampasaherong bus at habang tinatahak ang EDSA, pagsapit sa may Phil Am Subd., Brgy. Philam, Quezon City bigla na lamang nagdeklara ng holdap ang apat na lalaki na armado ng .45 kalibre ng baril at patalim.
Napag-alaman na isa sa pasahero na si Tessie de Guzman ay nasugatan nang akmang manlaban at matangayan ng mga suspek ng I- Touch cellphone na nagkakahalaga ng P30,000, habang ang isa pang pasahero ay pinalo rin ng baril sa ulo.
Matapos makuha ang mga gamit at pera ng mga pasahero ay mabilis na nagsibaba ng bus ang mga suspect sa may GMA sa EDSA.