3 pang suspect sa Ramgen slay, baka pumuslit din sa bansa - TF

MANILA, Philippines - Nababahala ngayon ang Task Force Ramgen ng Parañaque City Police na tulad ni Ramona Revilla ay makalabas din ng bansa ang tatlo pang suspek sa pagpatay kay Ramgen Revilla dahil sa hindi pa naiaakyat ang kaso sa korte.

Sinabi ni Parañaque City Police chief, Sr. Supt. Billy Beltran na nasa piskalya pa rin ang usapin sa kaso laban kina Glaiza Vista, nobyong si Norween dela Cruz at isang alyas Bryan kaya hindi pa makapagpalabas ng warrant of arrest laban sa mga ito.

Dahil sa wala pang pormal na kaso, wala pang nailalabas na hold departure order (HDO) ang Bureau of Immigration laban sa tatlong suspek­.

Ito rin ang ginawang dahilan ni Ramona, may palayaw na Mara, nang lumabas ito ng bansa patungong Hong Kong at sina­sabing nasa bansang Turkey na ngayon.

Sinabi ni Beltran na tulad ni Ramona, may kakayahan ang tatlong suspek na makalabas ng bansa dahil sa may pera rin ang mga ito.