Arabo biktima ng sindikato ng pick-up

MANILA, Philippines - Pagkadismaya ang kapalit ng magdamag na kaligayahan ng isang 34-anyos na Arabo nang magising na nawawala na ang kanyang pasaporte at wallet na naglalaman ng P5,000 cash sa loob ng tinutuluyang hotel sa Ermita, Maynila, kahapon ng umaga.

Sa reklamo sa Manila Police District-Ge­neral Assignment Section (MPD-GAS) ng biktimang si Saad Mohammad Aljaiyan, ng Riyadh, Alsarafa, Yassmen at pansamantalang nanunuluyan sa Room 610 ng Lotus Garden Hotel, isang nakilala niya sa pangalang Mary Grace Aquino, nasa 20 hanggang 25-anyos, ang suspect.

Aminado umano ang biktima na nakilala lamang niya ang suspect sa Ermita at isinama sa kanyang silid upang magpahinga.

Paggising niya dakong alas-11:00 ng uma­ga ay wala na ang babae at wala na rin ang kanyang pera at passport.