MANILA, Philippines - Isang negosyanteng Taiwanese ang iniulat na dinukot ng mga armadong kalalakihan na nanloob sa pabrikang pag-aari nito sa Valenzuela City, kamakalawa.
Kinilala ang biktimang si Ying Ching Chang, 29, ng Brgy. Parada ng nasabing lungsod.
Sa report ng Station Investigation Division (SID) ng Valenzuela City Police, dakong alas-2:16 ng hapon, nang salakayin ng mga suspek ang Luton Trading, na matatagpuan sa #20 sa panulukan ng Catmon at Malabo Sts., Brgy. Maysan ng nabanggit na siyudad, na pag-aari ng biktima.
Nilimas ng mga ito ang mga pera, alahas, laptop at iba pang mahahalagang gamit ng biktima. Itinali pa umano ng mga suspek ang mga paa at mga kamay ng tatlong empleyado at bago nagsitakas dala ang biktimang si Chang.
Hanggang sa kasalukuyan ay patuloy ang isinasagawang follow-up operation ng mga tauhan ng PACER at ng Valenzuela City Police upang i-rescue ang biktima at madakip ang mga suspek.