MANILA, Philippines - Patay ang isa umanong police asset makaraang pagbabarilin ng isang salarin habang ang una ay naglalakad papauwi sa lungsod Quezon kamakalawa ng gabi.
Kinilala ang biktima na si Andres Gonzales, 44, ng Rosal St., Ramirez Subdivision, Nova Proper sa lungsod.
Agad namang tumakas ang suspect matapos ang pamamaril. Nangyari ang insidente sa may Quirino Highway, Brgy. Novaliches Proper ganap na alas-8:30 ng gabi.
Diumano, naglalakad ang biktima sa nasabing lugar nang biglang sumulpot ang suspect at pagbabarilin ang biktima.
Sabi ng kaanak ng biktima, nagpaalam lang umano ito sa kanila na may bibilhin kung kaya nagulat na lang sila nang mabalitaang pinaslang ito.
Dead-on-the-spot ang biktima dahil sa mga tama ng bala sa katawan.
Sinasabing kilalang police asset ang biktima at hinihinala ng pulisya na maaaring naghiganti ang mga pinakulong nito kung kaya siya pinaslang.