Stage performer hinuli sa NAIA

MANILA, Philippines - Hinuli ng mga tauhan ng PNP-Aviation Security Group (ASG) sa bisa ng isang warrant of arrest ang isang stage per­former sa Ninoy Aquino Interna­tional Airport (NAIA) terminal 2 habang papuntang Hong Kong matapos siyang ipagharap ng reklamo ng isang batang lalaki.

Dinakip sa bisa ng warrant of arrest si Gil Pestano base sa warrant of arrest na inilabas ni Pasig RTC Judge Maria Rowena Modesto-San Pedro kaugnay sa kasong act of lasciviousness laban sa una.

Sinabi ni P/Insp. Carolina SP Desiderio, may impormas­yon silang aalis ng bansa si Pes­tano kaya naman pinamonitor nila ito sa airport. Hindi binanggit ng pulisya ang pa­ngalan ng menor-de-edad na biktima.

Ayon kay Desiderio, nang maispatan ang suspect ay agad nila itong hinuli at kusang loob naman itong sumama matapos ipakita ang warrant of arrest.

Ayon naman kay Pestano, nakatakda siyang magtungo sa Hong Kong para magtrabaho bilang entertainer sa Ocean Park.