Namamalimos, natutulog sa kalye bawal na sa Maynila

MANILA, Philippines - Huhulihin na at ka­kasuhan ang mga magulang ng mga batang namamalimos at pa­kalat-kalat na natutulog sa mga kalye at sidewalks sa Maynila.

Ito’y matapos na ma­ipasa sa ikatlo at huling pagbasa ng Konseho ng Maynila noong Agosto 11 ang “Anti-Child Endangerment Law of the City of Manila”, na naglalayong parusahan ang   magulang o sinumang mag-aabandona o ga­gamit sa isang menor- de-edad kung saan nalalagay sa panganib ang buhay ng mga ito.

Ayon kay Manila 2nd District Councilor Rod Lacsamana, may akda sa ordinansa, layunin nitong maturuan ng lek­siyon at maparusahan ang mga magulang na nagpapabaya sa kanilang mga anak.

Sinabi ni Lacsamana na hindi dapat na nila­lagay sa anumang pa­nganib ng isang magulang ang kanilang mga anak at walang anumang proteksiyon.

Ipinaliwanag ni Lacsamana na maraming batang nagpapalimos at gumagala sa kalsada ang karaniwang nagi­ging biktima ng krimen tulad ng pagkakasagasa at ginagamit ng mga sindikato.

Dahil dito, maaaring ma­kulong ng isa hanggang anim na buwan at multang P2,000 hanggang P5,000, depende sa edad ng bata, ang sinuman na mapapatunayang nagpapabaya.

Giit pa ni Lacsamana, ang magulang ang siyang­ dapat na gu­magabay sa­ maayos na paglaki ng kanilang mga anak at hindi dapat na ginagamit para sa kanilang kapakanan.

Dapat ding tiyakin ng mga magulang na mabi­bigyan ng sapat na edukasyon at kalinga ang mga anak at hindi dapat na iniiwan o pinababayaan.