Trader itinumba

MANILA, Philippines - Malapitang binaril sa ulo na naging dahilan ng agaran niyang kamatayan ang isang negosyante ng isang lalaki na isa sa mga most wanted criminal sa lungsod ng Muntinlupa kahapon ng umaga.

Kinilala ang biktimang si Romeo Cabiling Sr., 53, ng Ilaya St., Brgy. Alabang ng nabanggit na lungsod. Hindi na ito umabot pang buhay makaraang isugod sa Alabang Medical Center.

Samantala, nagsasagawa pa ng follow-up operation ang mga pulis laban sa suspek na si Manny Picardal “alias Didong”, ng San Guillermo St., Brgy. Putatan ng nabanggit na siyudad na sinasabing   isa sa mga most wanted criminal sa lungsod dahil sa kaso nitong murder na nakabinbin ngayon sa Muntinlupa City Regional Trial Court, Branch 206.

Ayon sa imbestigasyon ni SP01 Rodel Torres, ng Station Investigation Division (SID), Muntinlupa City Police, naganap ang insidente dakong alas-7:45 ng umaga, malapit sa bahay ng biktima sa kahabaan ng Ilaya St. ng nabanggit na lungsod kung saan biglang sumulpot sa harapan nito ang suspek na armado ng baril at walang sabi-sabi itong pinaputukan sa ulo ng malapitan.

Duguang bumulagta ang biktima habang ang suspek naman ay mabilis na tumakas sakay sa isang tricycle. Inaalam pa ng pulisya ang motibo sa naganap na krimen.