Staff ni Caloocan Vice-Mayor Erice utas sa ambush

MANILA, Philippines - Utas ang isang staff ni Caloocan City Vice-Mayor Egay Erice at sugatan naman ang kasama nitong babae matapos na pagbabarilin ng hindi pa nakikilalang suspek, kahapon ng umaga sa Caloocan City.

Dead on arrival sa Dr. Jose Rodriguez Tala Hospital ang biktimang si Samuel Delana, 44, ng Phase 8-A, Package 14, Bagong Silang ng nabanggit na siyudad sanhi ng tinamong mga tama ng bala ng baril sa katawan.

Samantala, ginagamot naman sa nabanggit na ospital si Nelda Dioquino, 54, na nagtamo ng sugat sa kaliwang braso.

Nagsasagawa pa ng follow-up ang mga kagawad ng Caloocan City Police laban sa hindi pa nakikilalang suspek.

Sa inisyal na imbestigas­yon ni P03 Julian H. Chavez, ng Station Investigation Division (SID), Caloocan City Police, naganap ang insidente dakong alas-10:15 ng umaga sa main road ng Water Tank, Phase 5, Bagong Silang ng nabanggit na siyudad.

Nabatid, na habang bu­mababa ng sasakyan ang biktima, biglang sumulpot ang suspek at walang sabi-sabing pinagbabaril ito hanggang sa bumulagta. Nahagip din ng bala ang kasama nitong si Dioquino.

Bukod sa pagiging staff ang nasawi ni Vice-Mayor Erice ay isa rin itong purok leader. Patuloy naman ang isinasagawang imbestigas­yon sa insidente.