Bangkay lumutang sa dam

MANILA, Philippines - Isang bangkay nang lalaki ang natagpuang palu­tang-lutang sa La Mesa dam sa lungsod Quezon, iniulat kahapon.

Ang biktima na personal na kinilala ng kanyang nanay sa pamamagitan ng tattoo na si Arvin Beltran­, ng No. 056 Legaspi St. Lupang Pangako, Group 5, Payatas, sa lungsod.

Ganap na alas-11:45 ng umaga nang makita sa loob ng La Mesa Dam partikular sa Group 5, Brgy Payatas B, ang bangkay ng biktima ng security guard sa naturang lugar. 

Nagpapatrulya ang mga sekyu nang mapuna nila ang katawan ng isang tao na palutang-lutang dahilan para agad nilang ipabatid ito sa pulisya.

Sa pahayag ng ina ng biktima, hinahanap nila ang biktima nang mawala ito noong Hulyo 28, 2011.

Ayon kay Insp. Ronald Mendoza ng scene of the crime operatives, ang biktima ay nasa stage of decomposition na pero wala namang nakitang sugat sa katawan nito.

Patuloy ang imbestigasyon ng pulisya sa nasabing insidente.