MANILA, Philippines - Sa ospital inaresto ang isang lalaki na wanted sa pamamaril na ikinasawi ng isang babae at pagkasugat ng 3 pang indibidwal kabilang ang isang binatilyo na naganap noong nakalipas na Hulyo 22, sa Tondo, Maynila.
Ang pag-aresto ay isinagawa ng pulisya kamakalawa ng gabi habang naka-confined sa Manila Central University (MCU) Hospital ang suspect na si James Bryan Dean, alyas “JB Demonyo” 26, ng Yangco St., Tondo.
Ayon sa ulat, ginagamot ang suspect dahil sa tinamong bala ng 9 mm. kalibre ng baril mula sa isa ring tinaguriang “JayR Bait” ‘trigger happy’ din ng Tondo, na inginuso naman ng concerned citizen kaya nasukol ito sa pagamutan.
Nasawi sa pamamaril ng suspect ang 45-anyos na si Angelita Santos, habang malubhang nasugatan ang isang Alexander Martin, 15 at dalawa pang sina Rodolfo Garcia, 65 at Blas Antonio, 43. Napag-alaman na ang suspect ay sangkot din sa robbery at direct assault nang lumaban sa mga awtoridad.
Matatandaang noong Hulyo 22 naganap ang insidente, dakong alas-11 ng gabi sa Coral at Franco Sts. nang biglang sumulpot ang suspect at pinaulanan ng bala ang tapat ng bahay ni Santos kung saan nagkukuwentuhan ang mga biktima na ikinasawi nito.