Rider lasog sa 2-sasakyan
MANILA, Philippines - Nagkalasug-lasog ang katawan ng isang motorcycle rider makaraang salpukin ng pampasaherong bus at pumailalim pa sa isang pick-up van, kamakalawa ng umaga sa Pasay City.
Nakilala ang nasawi na si Nestro Rodriguez, 59, ng # 358 Protacio Street, Pasay City.
Kapwa nahaharap naman sa kasong reckless imprudence resulting to homicide ang mga naarestong sina Robisito Lagumbay, 37, driver ng Joysell Express Bus (TXA-167) at Richard Asilo, 31, driver naman ng Nissan Frontier (FSA-808).
Sa police report, naganap ang insidente dakong alas-7:20 ng umaga sa kahabaan ng Macapagal Boulevard.
Lumilitaw na nagmomotorsiklo (XQ8962) ang biktima nang salpukin ng Joysell Bus ni Lagumbay.
Sa lakas ng pagkakabundol, tumilapon ang biktima at sumalpok naman sa hulihang bahagi ng Nissan pick-up ni Asilo.
Isinugod pa sa San Juan De Dios Hospital ang biktima subalit idineklarang patay.
- Latest
- Trending
