Color coding sa mga bus binubusisi na ng LTFRB

MANILA, Philippines - Sinimulang busisiiin ng Land Transportation Franchising Regulatory Board (LTFRB) ang planong pagpapatupad sa color coding scheme sa mga bus na bumibiyahe sa Metro Manila at sa mga lalawigan sa buong bansa.

Sinabi ni LTFRB Board Member Atty. Manuel Iway, ang pag-aaral ay ginagawa ng ahensiya matapos irekomenda sa kanila ni DOTC Secretary Mar Roxas na pag-aralan ang pagpapa­tupad ng color coding sa mga bus upang maglaho na ang problema sa mga kolorum.

Kapag naipatupad anya ang color coding scheme sa lahat ng passenger buses nationwide, kulay dilaw ang magiging kulay ng mga bus sa Metro Manila at wala pang kulay na napagdedesisyunan sa mga lalawigan.

“Uunahin munang ayusin ng agency ang tungkol sa mga bus sa Metro Manila kaya ang kautusang ito ni Secretary Roxas ay puspusan namin ngayong tinututukan para mapag-aralang mabuti,” pahayag ni Iway.

Nilinaw ni Iway na hands- off sila sa programa ng MMDA na maipatupad ang color coded roffing epektibo Agosto 15 ng mga pampasaherong jeep sa Metro Manila dahil hahayaan na lamang nila dito ang ahensya.