Manila, Philippines - Dalawang lalaki ang patay matapos na sorpresang ratratin ng mga naka-bonnet na suspect habang nakatayo ang mga una sa isang junkshop sa lungsod Quezon kahapon ng umaga.
Kinilala ni Supt. Ronnie Montejo, hepe ng Police Station 6 ng QCPD, ang mga nasawing biktima na sina Rodel Acero, 19; at Mark Gary Cabrito, 17; kapwa residente sa Brgy. Payatas.
Ayon kay Montejo, base sa mga pahayag ng mga residente, kilala umanong mga holdaper sa lugar ang mga biktima dahil sa serye ng naganap na holdapan na kabilang umano ang mga ito sa mga suspect.
Nangyari ang insidente sa may Mario’s junkshop na matatagpuan sa Litex Road, Brgy. Commonwealth ganap na alas-9:15 ng umaga.
Diumano, nakatayo ang mga biktima sa nasabing lugar nang biglang sumulpot ang dalawang suspect na nakasuot ng bonnet at pinaputukan ang mga ito. Mabilis ding nagsitakas ang mga suspect matapos ang pamamaril.
Patay agad si Acero na nagtamo ng tama ng bala sa ulo, habang si Cabrito ay nagawa pang isugod sa East Avenue Medical Center pero hindi na rin umabot pang buhay.
Sinisiyasat ngayon ng awtoridad ang umano’y anggulong pagkakasangkot ng mga biktima sa holdap at pinalalagay nilang maaring mga kasamahan din nila ang may kagagawan ng pamamaril.