Kelot dedo sa sekyu

MANILA, Philippines - Bumulagta ang isang hindi pa kilalang lalaki nang barilin sa likod na naglagos sa dibdib ng isang security guard na ikinamatay nito, sa J. Abad Santos Avenue sa Tondo, Maynila, kahapon ng madaling-araw.

Isang tama lamang ng bala ang kumitil sa buhay ng biktimang inilarawan sa edad 20-25; may taas na 5’4’’- 5’5’’; nakasuot ng kulay brown na sando, stripes na itim at puti ang suot na shorts at may mga tattoo na “Vanjang” sa kaliwang hita at “Benjo” sa kanang hita.

Isang security guard na hindi pa tukoy ang pagkikilanlan ang responsable umano sa pamamaril.

Nasa pagitan ng alas-2:00 hanggang alas-2:45 ng madaling-araw nang maganap ang nasabing insidente sa Abad Santos Avenue. Bago ito, ilang kalalakihan na tambay sa lugar ang nagbigay ng impormasyon na ang biktima ay nakita nilang may kinakalikot sa isang nakaparadang Isuzu truck (EVP-861) at nang muling tingnan ay tumatakbo umano ito papalayo hanggang sa makarinig sila ng putok. Patuloy pang iniimbestigahan ang insidente.