MANILA, Philippines - Isang security guard ang nasugatan makaraang barilin ito ng isang lalake na humoldap sa kanyang amo at tumangay sa tinatayang aabot sa P.5 milyong cash sa lungsod Quezon kahapon. Nakilala ang biktima na si Reynaldo Bato na agad na itinakbo sa East Avenue Medical Center.
Sinasabing target ng panghoholdap ng suspect ang biktimang si Marvin Nacionales, production manager sa Millys Distribution na matatagpuan sa Mindanao Avenue.
Nangyari ang insidente ganap na alas-12:10 ng tanghali kahapon matapos na bumalik ang biktimang si Nacionales sa kompanya sakay ng kanyang kotse mula sa pagwi-withdraw ng pera. Sinasabing pagpasok ni Nacionales sa gate ng compound ay biglang pumasok ang suspect, pero tinangkang harangin siya ng sekyu. Dahil dito, napilitan ang suspect na barilin si Bato sa pige, at maagaw ang laptop bag ni Nacionales na naglalaman ng P540,000 cash saka tumakas.
Isa sa anggulong tinitingnan ang inside job dahil posibleng may nagtimbre sa suspect hingil sa pagwi-withdraw nito ng malaking halaga.