MANILA, Philippines - Dahil hindi kaagad inihinto ang bus na minamaneho, isang tsuper ang binaril ng hindi kilalang pasahero kahapon ng umaga sa Malabon City.
Nasa kritikal na kondisyon at ginagamot sa Fatima Medical Center ang biktimang si Renato Quejano Jr., 47, ng ABC Town Homes, Holiday Villa, San Pedro, Laguna sanhi ng tinamong tama ng bala sa ulo buhat sa isang kalibre .45 baril.
Nagsasagawa pa ng follow-up operation ang mga pulis laban sa hindi pa nakilalang suspek, na nasa edad na 40 hanggang 45-anyos at may taas na 5’4 talampakan.
Ayon sa ulat, naganap ang insidente dakong alas-6:00 ng umaga sa kahabaan ng Governor, Araneta Avenue, Brgy. Potrero, ng nabanggit na siyudad.
Nabatid na pumara ang suspek upang bumaba, subalit hindi ito kaagad narinig ng biktima kaya’t tuloy-tuloy ang pagmamaneho nito na ikinagalit ng suspek hanggang sa nagtalo sila ng biktima.
Dito kinuha ng suspek ang nakatago nitong baril at pinaputukan sa ulo ang driver hanggang sa duguan itong bumagsak.
Mabilis na tumakas ang suspect na pasahero habang isinugod naman sa pagamutan ang biktima.