Karnaper umariba sa Taguig City

Manila, Philippines - Isa na namang negosyante ang natangayan ng sasak­yan matapos harangin ng mga armadong kalalakihan na sinasabing miyembro ng carjacking syndicate sa Taguig City kahapon ng madaling-araw.

Kinilala ng pulisya ang biktima na si Giovanni Tombado, hindi binanggit ang tirahan para sa seguridad nito.

Samantala, nagsasagawa na ng follow-up operation ang mga tauhan ng Anti-Carnapping Unit ng Taguig City PNP laban sa apat na armadong kalalakihan.

Naganap ang insidente dakong alas-4:30 ng madaling-araw sa kahabaan ng MRT Avenue, Barangay Central Signal Village ng nabanggit na lungsod.

Lumilitaw na binundol ang likurang bahagi ng Toyota Fortuner ng biktima kaya ito bumaba at suriin kung saan apat na armadong lalaki na ang bumaba sa kotseng sumalpok. Dito na tinutukan ng baril ang biktima kung saan natangay ang Toyota Fortuner.

Tinangka namang harangin ng ilang kalalakihang nakasaksi sa insidente subalit maging sila ay tinutukan ng baril.