2 holdaper todas sa shootout

MANILA, Philippines - Dalawang kalalakihan na pinaniniwalaang holdaper ang iniulat na napatay matapos makipagbarilan sa mga alagad ng batas sa tapat ng gasolinahan sa Pandacan, Maynila, kahapon ng madaling-araw.

Inilarawan ni P/Insp. Armand Macaraeg, hepe ng Manila Police District-Homi­cide Section ang dalawang napaslang na may edad 25 hanggang 30, may mga tattoo sa katawan at kapwa armado ng cal.22 revolver.

Sa ulat ni SPO2 Edmundo Cabal, naganap ang shootout dakong alas-12:15 ng madaling-araw sa panulukan ng Mendoza Street at Quirino Avenue sa Pandacan.

Lumilitaw na may tumawag sa MPD-District Tactical Operation Center kaugnay sa 2 lalaki na kahina-hinala ang kilos sa tapat ng gasolinahan ng Caltex kung saan ibinato naman ang impormasyon sa MPD-station 10-Pandacan.

Kaagad namang rumes­ponde ang mga tauhan ni P/Supt. Remigio Sedanto kung saan namataan ang dalawang lalaki na nakatayo ay animo’y may hinihintay.

Tinangkang sitahin ng pulisya ang dalawa subalit bago pa sila makalapit para kapkapan ay namaril ang mga suspek kaya ginan­tihan nila ito ng putok.