Pintor binoga sa makitid na daan

MANILA, Philippines -  Binaril at malubhang nasugatan ang isang pintor ng isang lalaki na nakagitgitan nito sa isang makitid na daan kahapon ng umaga sa Malabon City. Nasa kritikal na kondisyon si Patrick Villareal, ng Nueve de Pebrero Brgy. Pleasant Hills, Mandaluyong City, sanhi ng tinamong ilang tama ng bala ng baril sa katawan. Agad namang tumakas ang salarin matapos ang ginawang pamamaril.

Ayon sa ulat, dakong alas-2:30 ng umaga nang maganap ang insidente sa makitid na daan ng Mendiola St., Brgy. Longos, Malabon City. Nabatid na dumayo ang biktima upang makipamiyesta sa kaibigan nito nang makasalubong nito ang suspek hanggang sa nagkagitgitan sila sa maliit na daan.

Nagalit ang suspek at binunot nito ang kanyang baril at walang sabi-sabing pinaputukan ng ilang beses ang biktima.