Bagong silang na sanggol patay sa sakal

MANILA, Philippines - Isang kasisilang pa lamang na sanggol na babae ang natagpuang patay na hinihinalang sinadyang patayin sa pamamagitan nang pagsakal at saka itinapon sa Brgy. Socorro sa lungsod Quezon kahapon ng umaga. Dakong alas-8 ng umaga ng ma­tagpuan ng isang magbabasura na si Allan Garcia ang patay na sanggol sa may 14th Avenue ng naturang barangay. Ayon sa ulat, ang sanggol ay nakasilid sa isang shoe box at nakabalot ng tela kung saan nasa tabi nito ang kanyang imbilical cord na nakasilid sa maliit na supot ng plastic at ang leeg ay napapaluputan ng kapirasong tela. Ayon pa sa mga awtoridad, sa itsura ng sanggol ay maaaring pinatay ito sa sakal dahil sa nakalawit pa ang dila nito at sa nakitang kapirasong tela sa kanyang leeg. Nanawagan naman ang mga awtoridad sa sinumang nakakita sa taong nagtapon sa biktima na agad na ipagbigay alam sa kanila para magawan agad ng kaukulang aksyon.