MANILA, Philippines - Pinasok ng tatlong armadong lalaki ang isang bahay at iginapos ang may-ari nito bago tinangay ang mga ari-arian nitong nagkakahalaga ng P265,000 at isang kotse sa Malate, Maynila, kamakalawa ng gabi.
Sa reklamo ng biktimang si Adrian Marasigan, ng no. 1258 Estrada St., Malate, Maynila sa Manila Police District - Theft and Robbery Section, dakong alas-7:45 ng gabi nang maganap ang insidente sa loob ng kanyang bahay.
Nagulat siya ng pumasok ang tatlong lalaki at tinutukan umano siya ng baril. Sa takot ay hinayaan na lamang niyang igapos siya ng mga suspect at busalan ang bibig at nakita niyang nililimas ang mahahalagang kagamitan.
Kabilang din sa natangay ng mga suspect ang .45 caliber pistol na may tatlong magazine at kulay itim na Toyota Camry (XTW-644) at ‘di mabatid na halaga ng cash, alahas at iba pang mahahalagang gamit.