MANILA, Philippines - Matapos na mapabilang sa listahan ng Estados Unidos na notorious market sa mundo ang Quiapo tiniyak naman ni Acting Manila Mayor Isko Moreno na unti-unting buburahin ng city government ang imaheng ito.
Ayon kay Moreno, bagama’t hindi naman ganun kalala ang sitwasyon sa Quiapo, alam niyang responsibilidad ito ng city at national government.
Aminado ang opisyal na Metro Manila ang apektado sa nabanggit na ulat bagama’t ang lugar lamang ng Quiapo ang tinukoy kung saan itinuturing na isang landmark.
Kailangan din hindi ningas-cogon ang mga operasyon ng mga tauhan ng Optical Media Board na responsable laban sa nagkalat na mga pekeng DVD at VCD gayundin ang National Bureau of Investigation laban sa mga pekeng damit at personal na gamit.
Ipinag-utos naman ng opisyal sa pulisya na regular ang gawing monitoring hindi lamang sa mga nagbebenta ng pekeng bagay kundi maging sa mga gumagawa nito.
“Hindi naman magbebenta ang mga vendor kung walang ibebenta dahil umaasa lamang naman ang mga vendor sa maliit na kita ng kanilang ng paninda” pahayag pa ng opisyal.
Aniya, kailangan pa rin bigyan ng kabuhayan ang mga malilit na tao upang may panggastos sa kanilang pang araw-araw na pangangailangan.