2 holdaper dedo sa parak

MANILA, Philippines - Utas sa mga tauhan ng pulis-Maynila ang dalawang holdaper na nangholdap sa isang umano’y police asset sa Sampaloc, Maynila, kamakalawa ng gabi.

Bumulagta sa kalye at kagyat na namatay ang mga suspect na sina Marlon Dulay, 19, miyembro ng Bahala na Gang at isa pang hindi nakikilalang kasamahan nito.

Napag-alaman na dakong alas-9:15 ng gabi nang maganap ang engkuwentro sa panulukan ng Laong- Laan at Navarra Sts., Sampaloc, Maynila.

Nabatid na isang babaeng police asset ang pina­kawalan ni Supt. Jemar Modequillo sa lugar kung saan madalas ang holdapan at snatching hanggang sa lapitan siya ng mga suspect na riding in tandem habang nakatayo at kunwaring nag-aabang ng dyip habang bitbit sa balikat ang bag na may lamang laptop.

Tinutukan ng baril ang police asset at inagaw ang laptop bag kaya mabilis na lumapit ang mga nakaposteng tauhan ni Modequillo subalit inambaan na sila ng tutok ng baril ng mga suspect kaya agad nilang pinaputukan ang dalawa.

Nakuha sa kanila ang isang kalibre .38 revolver, at kalibre .22, kutsilyo at Suzuki motorcycle, habang nabawi din ang bag at laptop na ipinain sa mga holdaper­.