'Annulment lady' timbog ng NBI

MANILA, Philippines - Isang babae na ang modus operandi ay mag-annul umano ng kasal kapalit ang malaking halaga ang nadakip ng mga tauhan ng National Bureau of Investigation (NBI).

Nakilala ang suspect na si Mariebeth Pazcoguin, na kilala bilang “annul­ ment lady” matapos na mahuli sa isang entrapment operation bunsod ng reklamo ng isang Marydel Bacheller-Camilet.

Ayon kay NBI director Magtanggol Gatdula, pinapangakuan ni Pazcoguin ang mga mag-asawa na nais nang maghiwalay na kaya niyang ipa-annul ang kasal ng mga ito kahit hindi na dumalo sa anumang court hearings kapalit ng malaking halaga.

Batay sa inisyal na report ng NBI-Anti-Organized Crime Division (AOCD), si Pazcoguin ay inaresto sa isang entrapment operation sa   loob mismo ng isang mall sa Quezon City dakong alas 10:30 ng umaga habang binibigay ng isa nitong biktima ang balance ng napag-usapang halaga.

Sinabi ng biktima apat na taon na siyang hiwalay sa kanyang asawa nang makilala si Pazcoguin kung saan kina­usap niya ito upang ma-annul ang kanyang kasal dahi penipetisyon naman siya ng kanyang British boyfriend at nakatakda nang mag-migrate sa United Kingdom.

Agad namang nagbigay ng paunang bayad na P85,000   si Bacheller- Camilet subalit umabot ng limang buwan bago binigay sa kanya ang mga papeles na di nag­laon ay napag-alaman niyang mga peke.

Dito na siya humingi ng tulong sa NBI na nagsagawa ng bitag sa suspect.