Parak, 1 pa patay sa riding-in-tandem

MANILA, Philippines - Patay ang isang pulis at isa pang kasamahan nito makaraang ratratin ng bala ng isa sa dalawang salarin na magkaangkas sa isang motorsiklo, kahapon ng madaling-araw sa Taguig City.

Isinugod pa sa Taguig-Pateros District Hospital ngunit hindi na rin umabot ng buhay si SPO2 Eduardo Maninang, nakatalaga sa District Public Safety Battalion ng Southern Police District (SPD), ng Middle Street, Brgy. Central Signal, Taguig habang dead-on-the-spot ang kasamahan nitong si Modesto Bantola, 45, ng Miranda St., ng naturang lungsod.

Sa ulat ng Taguig police, naganap ang pama­maslang dakong ala-1:30 ng madaling-araw sa kahabaan ng Luzon Street, Brgy. Central Signal Village. 

Nabatid na kapwa nakatayo ang dalawang biktima sa naturang lugar nang lapitan ng gunman na armado ng hindi pa mabatid na kalibre ng baril.

Sunud-sunod na pinaulanan ng bala ng gunman ang dalawang biktima bago mabilis na tumakas nang kapwa duguang malugmok ang mga target. Nabatid na sumakay ang gunman sa naghihintay na motorsiklo at pinaharurot ito ng driver sa kanilang pagtakas.

Sa imbestigasyon, may hinala ang pulisya na maaaring nadamay lamang ang pulis sa pamamaslang kung saan maaaring ang target talaga ay si Bantola na siyang inunang barilin ng gunman.

Ipinag-utos na ni SPD Director Chief Supt. Jose Arne delos Santos ang masusing imbestigasyon sa krimen at pagtugis sa mga salarin.