5 fastfood chain, bookstore tinaningan sa paggamit ng plastic

MANILA, Philippines - Binalaan at nagbigay ng ultimatum ang Muntinlupa City government laban sa limang sikat na fastfood restaurant at isang kilalang bookstore na ipapasara ang mga ito at mapapa­ralisa ang kanilang operasyon dahil sa paglabag sa ordinansang pinatutupad hinggil sa pagba-ban ng paggamit ng plastic at styrofoam sa nabanggit na lungsod.

Pansamantalang hindi muna pina­ngalanan ng Muntinlupa City government ang nabanggit na mga establisimyento kung saan ang mga ito ay kabilang sa 775 violators na nahuling lumabag sa nabanggit na ordinansa habang inaantabayanan ang kanilang compliance sa Ordinance No. 10-109 ngayong linggo matapos bigyan sila ng ultimatum sa hindi pagtupad dito.

Ito ay kinumpirma ni Muntinlupa City Public Information Office Chief Omar Acosta sa paglulunsad sa Asso­ciation Information Officers of Metro Manila (AIMM) sa Parañaque City na nagsa­bing kung hindi tutugon ay maaaring ipasara ang kanilang negosyo at revocation sa kanilang permit at licenses.

Nabatid na ang dalawang fastfood restaurants ay matatagpuan sa Brgy. Putatan sa harap mismo ng city hall habang ang dalawa pa ay nasa national road sa Brgy. Poblacion, ang bookstore ay nasa Tunasan.

Napag-alaman na ang mga nasa­bing establisimiyento ay pawang mga second-time offenders sa isinagawang sorpresang pag-inspeksiyon ng ESC at BPLO.