MANILA, Philippines – Isang 40-anyos na lalaki na nakasuot ng police uniform na may insignia na ranggong colonel ang dinakip ng mga tauhan ng Manila Police District-District Intelligence Division sa Sampaloc, Maynila, kamakalawa ng hapon.
Kinilala ang nadakip na suspect na si Randy Ganal ng #825 San Diego St., Sampaloc.
Nabatid na habang nagsasagawa ng surveillance at monitoring ang mga pulis sa posibleng carnapping at carjacking sa lugar ay napuna ang suspect na nakabisikleta sa San Diego St. dakong alas-2:30 ng hapon.
Dahil sa kahina-hinalang kilos hinarang ito ng mga pulis at tinanong kung saan nakadestino at hinanapan ng identification card. Nakita sa suspect ang badge na peke kasama ang maraming PNP IDs na may ranggong Supt. (colonel) at may chief inspector (Major) at lieutenant. Maging ang series ng numero sa badge ni Ganal ay kaduda-duda na napatunayang peke rin.
Sa beripikasyon sa PNP Camp Crame, natiyak na hindi konektado o miyembro ng PNP ang suspect.