MANILA, Philippines - Kapwa nasawi ang magpinsan matapos na saksakin ang mga ito ng dalawang hindi pa nakikilalang kalalakhan habang naglalaro ng pool kamakalawa ng gabi sa Caloocan City.
Namatay habang ginagamot sa Tondo General Hospital sanhi ng mga saksak sa katawan sina Jomar Gemino, 31; at Ariel Rosales, 23, kapwa ng Salay-Salay St., ng nabanggit na lungsod.
Nagsasagawa pa ng follow-up operation ang mga pulis laban sa mga suspek.
Sa imbestigasyon ng Caloocan City Police, naganap ang insidente dakong alas-10 ng gabi sa tapat ng bahay ng mga biktima sa nabanggit na lugar habang naglalaro ng pool ang mga ito nang biglang sumulpot ang mga suspek at walang sabi-sabi silang inundayan ng sunud-sunod na saksak.
Matapos ang insidente ay tumakas ang mga suspek habang dinala naman ang magpinsan sa pagamutan, subalit hindi na umabot ng buhay. Iniimbestigahan pa ang naturang insidente.