Eskuwelahan sa Malabon binulabog ng 'bomba'

MANILA, Philippines - Sinuspinde ang klase makaraang mabulabog ang mga guro at mga estudyante  sa isang paaralan sa Malabon nang may mag-text na sasabog ito kahapon ng umaga.

Sa report ng pulisya, nabatid na alas-10:55 ng umaga, nakatanggap ng text ang gurong si Luisa Jacaban,  ng Tonsuya Elementary School, na matatagpuan sa  Sanciangco St., Brgy. Tonsuya ng nabanggit na  lungsod na nagsabing sasabog anumang oras ang nasabing eskuwelahan.

Agad na ipinagbigay alam ni Jacaban sa principal na si Mrs. Marilou Cabais ang mensahe na agad namang tumawag ng pulis. Kumalat ang balita at nagdagsaan ang mga magulang ng mga bata hanggang sa magdatingan ang mga pulis subalit nang suyurin ay wala naman nakitang bomba.

Tuluyan na rin pinauwi ang mga bata na may mga sundong magulang kung saan nagsasagawa na nang imbestigasyon ang pulisya ukol sa insidente.