Obrero kinatay ng kelot

MANILA, Philippines - Isang obrero ang nasawi matapos itong pagsasaksakin hanggang sa mapatay ng isang hindi nakikilalang salarin habang papauwi sa kanyang tahanan sa Quezon City kamakalawa.

Kinilala ni SPO1 Randy Escobido, may-hawak ng kaso, ang biktima na si Rodolfo Senoja, 35,  ng # 31 Libis Compound, Kalayaan C Extension, Barangay Batasan Hills, sa lungsod.

Ayon kay Escobido, ang biktima ay inatake ng saksak ng hindi nakikilalang suspect sa may Kalayaan C. Extension ganap na alas 5 ng hapon.

Isinalarawan ng testigo ang suspect sa edad na 30 hanggang 40 anyos, nasa pagitan ng 5’3” hanggang 5’6” ang taas, balingkinitan, nakasuot ng maong at polo shirt.

Si Senoja ay nagtamo ng isang tama ng saksak sa kaliwang kilikili at kaliwang dibdib na ikinamatay nito.

Nagawa pang makatakbo, kahit sugatan ang biktima sa bahay pero bumulagta rin ito kung saan idineklara itong dead on arrival matapos isugod sa Fairview General Hospital.

Patuloy ang imbestigasyon ng pulisya upang matukoy ang motibo ng pananaksak sa biktima.