MANILA, Philippines - Dahil sa umaalingasaw na mabahong amoy, nadiskubre ang bangkay ng hindi pa nakikilalang babae na nakasilid sa isang drum sa likod ng bahay ng isang tauhan ng Phil. Air Force sa Caloocan City, kamakailan.
Sa report na nakarating sa tanggapan ng Station Investigation Division (SID) ng Caloocan City Police, ang biktima na hanggang sa kasalukuyan ay hindi pa rin nakikilala ay inilarawan lamang na nasa gulang na 40 hanggang 45-anyos, may taas na 5’2’’, kayumanggi, malusog ang pangangatawan, nakasuot ng white knitted cardigan at green na Abercrombie t-shirt.
Base sa ulat, natagpuan ang bangkay ng biktima na nakasilid sa drum sa likod ng bahay ni M/Sgt. Nestor Duran Agcaoili, nakatalaga sa Communication Electronics and Information System Service ng PAF sa Block 25-C, Lot 16, Hagonoy St., Dela Costa Homes II Subdivision, Brgy. 179 ng nasabing lungsod.
Patuloy namang nagsasagawa ng masusing imbestigasyon ang mga awtoridad upang matukoy kung sino ang may kagagawan sa karumal-dumal na pagpatay.
Natuklasan lamang ito makaraang magreklamo ang mga residente sa lugar tungkol sa umaalingasaw na mabahong amoy kung kaya hinanap nila ang pinagmumulan.
Nagulantang ang mga ito nang tumambad sa kanila ang drum kung saan naka silid ang kalahating katawan ng biktima.
Agad na ipinaalam ng mga ito sa mga awtoridad ang natagpuang bangkay at base na rin sa isinagawang pagsisiyasat ng Scene of the Crime Operation (SOCO) ng Northern Police District (NPD), may ilang araw nang patay ang biktima bago ito natagpaun ng mga residente.
Hanggang sa kasalukuyan ay patuloy ang isinasagawang imbestigasyon sa kaso.