MANILA, Philippines - Isang holdaper ang namatay habang dalawang kasamahan nito ang nahuli ng mga awtoridad makaraang mambiktima at pagtulungang bugbugin ng taumbayan kahapon sa Quezon City.
Dead-on-arrival sa East Avenue Medical Center ang holdaper na si Richard Reyes alias “Adong” ng 3rd St. Kalayaan B., Batasan Hills ng nabanggit ding lungsod.
Ginagamot din sa naturang ospital ang nabiktima nitong si John Francis Raymundo,26, aluminum fabricator ng 125 Mabiyaya St. Freedom Park-1 Bgy. Batasan Hills Q.C.
Kasalukuyan namang nakakulong ang dalawa pang holdaper na sina Johnro Tolero, 21 at Darwin Valdez, 20 kapwa nakatira sa 4th St. Kalayaan-B, Batasan Hills QC.
Base sa ulat ni SP01 Randy Escobido ng Quezon City Police District-Criminal Investigation and Detection Unit (QCPD-CIDU), nangyari ang panghoholdap bandang 12:30 ng madaling araw ilang metro ang layo sa bahay ng biktima.
Naglalakad pauwi ang biktima nang lapitan siya ng tatlong suspect na armado ng patalim at baril at pilit na kinukuha ang cellphone nito.
Subalit sa halip na matakot ay pumalag ang biktima dahilan para saksakin siya ng dalawang beses sa kaliwang hita pero naagaw niya ang patalim sa isa sa mga suspect at saka itinutok sa leeg ni Reyes.
Dahil sa pangyayari nagpulasan sina Tolero at Valdez habang humingi ng tulong sa mga residente ang biktima. Dito ay kinuyog si Reyes ng taumbayan dahilan para ito ay mamatay.
Agad namang natunton ng mga pulis ang kinaroroonan nina Tolero at Valdez kung kaya’t papa nagutin ang mga ito sa krimen.