MANILA, Philippines - Patay ang mag-asawang negosyante matapos na pagbabarilin ng hindi pa nakikilalang mga holdaper kahapon ng hapon sa Malabon City.
Dead-on-arrival sa Tondo Medical Center (TMC) sina Oliver Magcalas, 41 at misis nitong si Ana Mae, 37 matapos na magtamo ng mga tama ng bala ng baril sa katawan.
Kasalukuyan namang nagsasagawa ng follow-up operation ang mga pulis upang matukoy ang pagkakakilanlan ng dalawang suspect na mabilis na tumakas matapos ang insidente.
Base sa nakalap na impormasyon ng Station Investigation Division (SID) ng Malabon City Police, naganap ang insidente dakong 2:30 ng hapon sa kahabaan ng Flores St., Bgy. Flores ng nabanggit na lungsod.
Nabatid na galing sa paniningil sa kanilang negosyong manok ang mag-asawa nang harangin ng mga suspect habang papasok ng kanilang bahay.
Agad na kinuha ng mga suspect na kapwa armado ng mga baril ang pera ng mag-asawa.
Subalit tinangka ni Oliver na manlaban ng makakita ng pagkakataon ngunit agad naman itong pinagbabaril ng isa pang suspect.
Kasunod namang binaril ng isa sa mga suspect si Ana Mae at kinuha ang pitaka at bag ng mag-asawa.
Matapos ang insidente ay mabilis na tumakas ang mga suspect sakay ng isang motorsiklo sa hindi natukoy na direksiyon.