ASG na 'tulak', arestado sa QC

MANILA, Philippines - Isa umanong miyembro ng bandidong Abu Sayyaf na nag-shift sa pagbebenta ng droga sa Metro Manila ang natimbog ng mga operatiba ng Quezon City Police District Ant-Illegal Drugs Division-Special Operation Task Group (DAID-SOTG) sa isinaga­wang buy-bust operation sa kanyang lungga sa lungsod, iniulat kahapon.

Sa ulat na ipinadala kay QCPD director Chief Supt. Benjardi Mantele ni Senior Insp. Roberto Razon Jr., hepe ng DAID-SOTG, kinilala ang suspect na si Alton Ladjaalam, alyas Al, 33, may-asawa, tubong-Jolo, Sulu at residente sa Lanao St., Slam Mosque com­pound, Brgy. Culiat, Tandang Sora sa lungsod.

Sinasabing si Ladjaalam ay positibong kinilala ng isang testigo ng Philippine Air Force na kabilang sa bandidong grupong Abu Sayyaf na naka­base sa Sulu.

Nadakip ang suspect sa isinagawang buy-bust opera­tion ng tropa ng DAID sa mis­mong lungga nito ganap na alas-5:30 ng umaga.

Bago nito, isang impor­mante ang umano’y nagpunta sa tanggapan ni Razon at nag­ bunyag sa iligal na tran­sak­syon ng isang alyas Al na mi­yem­bro umano ng Abu Sayyaf at nagtatago sa kan­yang ka­tauhan bilang no­torious na drug pusher sa lugar. Dito ay nagsagawa ng sur­veillance ang tropa hanggang sa isa­gawa na nga ang buy-bust operation.

Ipinagharap na ng kasong paglabag sa Republic Act 9165 ng dangerous drug law ang suspect.