Paslit utas sa sumabog na fuse ng kuryente

MANILA, Philippines - Isang tatlong-taong gulang na batang babae ang nasawi makaraang sumabog ang fuse sa poste ng Meralco at ta­maan ng pira-piraso nito ang ka­tawan ng una sa lung­sod Quezon, iniulat kahapon.

Kinilala ang biktima na si Janly May Buenaobra, ng Bgy. Gulod, Novaliches, na idinekla­rang dead-on-arrival sa Nova­liches General Hospital.

Sa isinagawang X-ray examination sa bangkay ng paslit nakita ang mga matu­tulis na bagay malapit sa puso nito.

Sa ulat ng Police Station 4 ng QCPD, lumilitaw na nang­yari ang insidente sa may kahabaan ng Villareal St., Brgy. Gulod ganap na alas-4 ng hapon.

Diumano, naglalakad ang magtiyahin sa naturang lugar nang bigla na lamang umali­ngawngaw ang malakas na pagsabog na galing sa poste ng kuryente.

Ayon kay Janice, nagulat na lang siya nang makitang bumagsak ang pamangkin sa kalye at may lumalabas na dugo sa dibdib nito.

Agad namang itinakbo ang biktima sa Novaliches Gene­ral Hospital, pero hindi na rin ito umabot pa ng buhay.

Naniniwala ang pamilya ng biktima na ang matulis na ba­gay na nakuha sa loob ng kata­wan ng biktima ay ang piraso mula sa sumabog na fuse.

Binanggit sa ulat na ma­dalas umanong nangyayari ang pagsabog ng fuse sa ka­nilang lugar dahil na rin sa talamak na iligal na konek­syon.