Robbery gang leader, 1 pa timbog

MANILA, Philippines - Nadakip ng Caloocan City police ang lider ng “Rex Cortez robbery gang” at isa pang tauhan nito na nasu­gatan sa pakikipagbarilan sa isang pulis matapos na holdapin ang isang pam­pasaherong jeep, kahapon ng madaling-araw sa natu­rang lungsod.

Kinilala ni Chief Insp. Crisencio Galvez, hepe ng Intel branch ng Caloocan police­, ang mga nadakip na si Rex Cortez y Pail, 28, ng no. 39 Libis Espina St., Bgy. 18 at tauhan nito na si Alfred Villagomez, 28.

Sa ulat ng pulisya, da­kong alas-5:30 ng ma­daling-araw nang holdapin ng grupo ang isang pam­pasa­herong jeep sa may Libis Espina St. Tiyempo naman na napadaan si PO1 Gian Clifford Malonzo lulan ng kanyang motorsiklo at sinita ang mga suspect.

Ayon kay Malonzo, agad siyang pinaputukan ng mga suspect sanhi upang gu­manti siya ng tatlong putok.

Nagawa namang maka­talilis ng mga suspect dala ang mga salapi at mahaha­lagang gamit ng mga pa­sahero.

Dakong alas-6:15 ng umaga nang makatanggap ng tawag ang Caloocan police sa Jose Reyes Memorial Medical Center ukol sa isang kahina-hinalang lalaki na dinala sa pagamutan dahil sa tama ng bala. Agad namang tinungo ng mga pulis ang pagamutan kung saan nadiskubre ang pas­yente na si Villagomez na kasama ni Cortez sa pang­hoholdap.

Sa pagtatanong ng pu­lisya, naikanta ni Villa­gomez ang pinagtataguan ni Cortez sanhi upang maaresto ito sa follow-up operations.

Ayon sa pulisya, ang grupo ni Cortez ang res­ponsable sa sunud-sunod na pangho­holdap ng mga pampasa­herong jeep sa lungsod at mga naglalakad sa madi­dilim na eskinita.