Esquivel sinibak na sa MMDA

MANILA, Philippines - Matapos ang sunud-sunod na kontrobersyang kinasangkutan, tuluyan nang sinibak ni MMDA Chair­man Francis Tolen­tino ang kinuha niyang traffic consultant na si Roberto Esquivel.           

Ito ang laman ng me­mo­randum na pinirmahan ni Tolentino makaraan ang pakikipagbangayan ni Esquivel kay Ret. Col. Eduardo Bayangos na nakatalaga rin sa Traffic Enforcement Office na muntik na umanong hu­man­tong sa barilan.

Pi­na­tawan rin naman ni Tolen­tino ng 15-araw na suspensyon si Bayangos na ibinase sa resulta ng imbestigasyon ni Atty. Rochelle Macapili, hepe ng Legal Division ng MMDA.           

Nagsasagawa rin naman ngayon ng imbesti­gas­yon ang Legal Division ukol sa napaulat na pagpa­palabas sa nahuling 15-kolorum na bus na ini-impound sa MMDA im­pound­ing area matapos na makapaghatag umano ng lagay ang mga operators nito.           

Nabatid naman na una na ring nakabangga ni Es­quivel ang isa pang con­sultant ng ahensya na si ret. Gen. Danilo Gaoiran kung saan narinig pa ang kanilang bangayan sa “two-way radio” na narinig sa MMDA Metro Base at lahat ng enforcers na may hawak na radyo.