Number coding sa mga bus, pinaboran ng MM mayors

MANILA, Philippines - Inihayag kahapon ng Metropolitan Manila Deve­lop­ment Authority (MMDA) na puma­yag na ang ma­yorya ng mga alkalde sa Metro Manila na muling ipa-implementa ang number coding sa mga pam­pasa­herong bus ka­sunod ng muling pagsisikip ng trapiko ngayong mga naka­raang linggo.           

Ito ang napagkasunduan sa pulong ng mga alkalde na bumubuo sa Metro Manila Council (MMC) nitong naka­raang Miyerkules. 

Tatlo naman sa kina­tawan ng mga lungsod ang sinabing pag-aaralan pa ang mosyon. Sinabi ni Chairman Francis Tolentino na may aga­rang pangangailangan na ma-regulate ang dami ng bus na bumi­biyahe sa mga pangu­nahing lansangan partikular na sa EDSA kasa­bay ng muling pagsisikip ng trapiko dahil sa panay-panay na pagbuhos ng ulan.           

Hiniling naman nito sa mga kinatawan ng mga lung­sod sa MMC na mag­bigay ng kanilang mga suhestiyon at opinyon para sa maayos na implemen­tasyon ng number coding sa mga pampasa­herong bus.         

Suportado ang mosyon ni Malabon City Mayor Canuto Oreta at maging mga kina­tawan ng mga lungsod ng Marikina, Quezon, at iba pa. Hiniling naman ng Makati City, Muntin­lupa City at Valenzuela City na masusi pa nilang pag-aralan ang usapin bago magdesisyon.           

Nabatid na dati nang sakop ng number coding ang mga pampasaherong bus hanggang sa isuspinde ito ni dating Pangulong Gloria Macapagal Arroyo noong 2004.