MANILA, Philippines - Isang 8-buwang sanggol na lalaki ang nasawi nang lumusot ang ulo nito sa butas ng duyan, sa Tondo, Maynila kamakalawa ng hapon.
Nakilala ang nasawi na si John Prince Henry ng 36-B Quezon St., Tondo, sanhi ng matinding pinsala sa kanyang ulo.
Sa ulat ni Det. Lito Lopez ng Manila Police District-Homicide Section, dakong alas-3 ng hapon nang makaidlip umano ang ina ng sanggol na si Richelle Eulogio Frogosa Henry, 24, sa loob ng kanilang bahay habang nasa crib ang baby.
Alas-6 ng gabi nang tuluyang bawian ng buhay ang sanggol sa ospital.
Naniniwala ang mga awtoridad na maaring nagising ang sanggol at habang naglalaro ito ay lumusot ang ulo sa siwang ng crib.
“Meron kasing butas ’yung crib na pwedeng magkasya ’yung ulo ng bata at doon siya pumasok,” paliwanag ni Lopez.
Lumagda naman sa ‘waiver’ ang ina ng sanggol sa pakiusap na huwag nang imbestigahan ang kaso dahil wala namang foul play at hindi niya umano ginustong mangyari ito sa anak.